महिला हिन्साका घटनाको अनुसन्धान फितलो-महिला अायोग

प्रहरीले महिला हिंसाका घटनाको अनुसन्धानमा लापर्बाही गरेको भन्दै राष्ट्रिय महिला आयोगले असन्तुष्टि जनाएको छ ।

पछिल्लो समय बाँकेमा भइरहेका महिला हिंसाका जघन्य अपराधमा समेत प्रहरीले गहिरो अनुसन्धान नगरेको आयोगका प्रवक्ता मोना अन्सारीले आरोप लगाइन् ।

चैत ३ गते बाँके लक्ष्मणपुरकी गर्भवती रिहाना शेषलाई पति फारिदसहित परिवारले मटि्टतेल छर्केर आगो लगाएर हत्या गरेको थियो । गत शुक्रवार परस्पुर गाउँमा अर्की गर्भवती गोल्डी चर्तुबेदीको जलेर मृत्यु भयो । दुवै वटै घटनाको प्रहरीले अनुसन्धान नगरेकोभन्दै अन्सारीले असन्तुष्टी जनाएकी हुन् ।

'तस्करी वा चोरीका घटनामा प्रहरीले सक्रियता देखाउँछ । तर, महिला हिंसाका गम्भीर घटनामा पनि अनुसन्धान फराकिलो बनाएको पाइएन', आइतवार नेपालगन्जमा पत्रकार सम्मेलन गर्दै अन्सारीले भनिन्, 'स्रोतसाधन अभाव छ भने भन्नुपर्‍यो । हैन भने अनुसन्धान साघुँरो बनाउनु भएन ।'

प्रहरीले चोरीको आरोपमा बाँके भवानीयापुर-३ स्थित बाबुगाउँका ६२ वर्षीया प्यारा धोबी र १४ वर्षीया शुक्रनालाई प्रहरी थानामा ल्याएर यातना दिइएकोप्रति पनि महिला आयोगले आपत्ति जनाएको छ । प्याराका छोरा राजुलाई खाली काजगमा औठा छाप लगाएर छाडिएकोप्रति शंका व्यक्त गर्दै अन्सारीले भनिन्,'चोरीमा संलग्न हो भने कानुनी कारबाही गर्नुपर्‍यो । प्रहरीले निलडाँम हुने गरी कुटपिट गरेको पाइयो ।'

Source: ekantipur