महिला हिंसा अनुगमन गर्न आयोग टोली बाँकेमा

नेपालगन्ज, बाँकेमा महिला हिंसा अत्याधिक बृद्धि भएपछि अनुगमन गर्न आएको राष्ट्रिय महिला आयोगको टोलीले त्यस्ता घटना न्यूनीकरण गर्न छुट्टै सरकारी नीतिको माग गरेको छ  ।
पछिल्लो सात महिनामा बाँकेमा सात जना महिला जिउदै जलाईएपछि आयोगको टोली अनुगमनका लागि आएको हो । आयोगका प्रवक्ता मनु हुमागाईको नेतृत्वमा रहेको पाँच सदस्यीय जलाईएका घटनाबारे विस्तृत अध्ययन गरी आइतवार प्रारम्भीक प्रतिवेदन सार्वजनिक गरेको छ । प्रतिवेदनमा जलाउने घटनाको गहिरो अनुसन्धान गरी दोषीमाथि हदैसम्मको कारबाही, फरार अभियुक्तलाई पक्राउ गर्न र उपचारपछि फर्केका पीडितलाई सम्मान र सुरक्षाको माग गरिएको छ ।
त्यस्तै, घटनामा मृत्यु भएका महिलाका असहाय बालबालिकाको स्थिती दयनिय रहेकोभन्दै उनीहरुको लालनपालन र शिक्षाको व्यवस्था गर्नसमेत माग गरिएको छ । धेरैजसो घटना दाईजोको निहुमा भएकाले दाईजो सम्बन्धी ऐनको विधेयक छिटो पास गर्नुपर्ने प्रवक्ता हुमागाईले बताईन् । 'बोक्सी र दाईजोबिरुद्धको ऐनका विधेयकहरु पेस भईसकेका छन्'-उनले भनिन्- कानूनी व्यवस्थापछि नियन्त्रणमा सघाउ पुग्छ ।
उनले जिउदै जलाउनेजस्ता क्रुर र अमानविय ढंगका हिंसा हुने समुदायका लागि विशेष जनचेतनामुलक कार्यक्रम ल्याउनुपर्ने पनि बताईन् । उनका अनुसार, गत बर्ष देशभरमा ४५६ महिला हिंसाका घटना भएको उजुरी आयोगमा आएकोमा १७९ घरेलु हिंसासम्बन्धी रहेका थिए ।